العوده للجواز مره اخرى

ورجعنا تانى لعالم التدوين

والجواز بالطبع

احنا ورانا ايه غيره

بس امور البيزنس كانت واخده الواحد الكام شهر اللى فاتوا

وارجوا الا يعتقد احد اننى هربت بسبب التهديدات التى وصلتنى بسبب اخر مواضيعى

والحمله ضد البنات ولا حاجه

وانما الواحد قال يعمل قرشين لزوم مصاريف الزواج

امال يعنى حشترى الشاكوزى ازاى

واشكر كل من سأل عليا اثناء تأديه الخدمه الصيفيه

واخص بالشكر سما والاميره ميرا

وكل من عبرنى وسأل عليا

وانتظرونا قريبا

على امل ان يوافق الحاج ابويا ويجوزنى وابطل كتابه فى عاوز اتجوز

لانى حبقى اتجوزت خلاص

قولوا يا رب

البنت زى الولد

قال صلاح جاهين رحمه الله

البنت زى الولد
ماهش كماله عدد

ورغم ان هذه الجمله الان غير صحيحه
والاصح ان نقول

البنت زى الولد
الاتنين مالهومش لازمه
ولكن المهم
اذا تمسكن بهذه القاعده
فليكن
ولكن يجب ان يدفعن ثمن ذلك
احنا نتكروت بمزاجنا
اما غصب عننا لأ

وبما ان قانون الندره النسبيه يحكم الان مسأله الزواج
والرجاله اصبحوا فى ندره البتنجان الاخضر

فهنا لنا وقفه
يجب ان نطالب بحقوقنا نحن معشر الرجال
من الان
الشبكه على العروسه
العفش ولوازم البيت على العروسه
مصاريف البيت على العروسه
والعريس عليه المطبخ والحمام والبلكونات
هو حد لاقى شباب للزواج هذه الايام
احنا نقعد فى البيت معززين مكرمين
والعدل ييجى لغايه البيت
كفايه بهدله بقى
ده قريب حصرفوا الستات على بطاقه التموين
وممكن تتجوز واحده
يدولك التانيه هديه
احنا بس اللى مش حاسيين بقيمتنا
وقد بعز من كنزر
انا قلت اهو
وحبدأ بنفسى

ومن تريد الزواج منى
تتقدم بطلب على عرضحال ودمغه ب1.25 جنيه
وتتنظر ميعاد المزاد
ولاعلى سعر
وتجيب الشقه بلوازمها
انا اروح بيت العدل بالهدوم اللى عليا

هوا انا شويه يا جدعااااااااااااان
.

الطيبون للطيبات

(الطيبات للطيبين والخبيثات الخبيثين )

واحد يسألنى ويقول لى

ياكابتن لطيف هناك زيجات كثيره لا تنطبق عليها هذه الايه بل العكس

اقوله ازاى ؟

يقولى يا كابتن هناك زيجات المفروض يقال عنها

(الطيبون للخبيثاث والخبيثون للطيبات )

يعنى رجل صالح ومؤمن بالله يتزوج زوجه تكون لعنه عليه (نكديه)

and vice versa
(يعنى العكس صحح )

أقول لهذا الكلام : حاشا لله ان يكون هناك خطأ فى القرأن
ولكن هناك بالفعل زيجات يتضح من الوهله الاولى ان كلامك صحيح

ولكن اذا امعنا النظر
عرفن اننا امام موضوع اخر
وهو

الصبر على البلاء
او
الامتحان

بمعنى ان الله يريد ان يمتحن ايمان العبد (ذكر او انثى ) والقدره على تحمل البلاء

فالناس درجات فى قوه ايمانهم

فهناك رجل قوه ايمانه فى غناه واذا اصبح فقيرا ضعف ايمانه (هذا لا يفقره الله )
وهناك رجلا قوه ايمانه فى فقره واذا اصبح غنى ضعف ايمانه (وهذا لا يغنيه الله )
وهناك رجلا قوه ايمانه فى صحته فأذا مرض ضعف ايمانه
هناك رجلا قوه ايمانه فى مرضه فأذا شفى ضعف ايمانه

والله اعلم بقوه ايمان عبيده

ولذلك يبتلى الله بعض الناس وليس كلهم
كل واحد حسب قوه ايمانه

والابتلاء نعمه من الله لا يعلمها الا عباده المخلصين
فالله يبتلى الانسان اما فى ماله او ولده او صحته او زوجته
ومن يصبر على البلاء يجازيه الله احسن جزاء

ويقربه الله منه

ولذلك لا تعارض بين الايه الكريمه والواقع

وندعوا الله ان نكون من عباده المقربين

فأذا رزقت بزوجه (نكديه) فأصبر واحتسب
.

النسوان بين المطرقه والسندان

من مقتضيات هذا العصر ان تكون المرأه اقرب الى الرجل فى الطباع
من حيث الشده والعنف والغضب
واختفى - او كاد يختفى - وجهه المرأه الانثوى الهادئ
ذات الطباع الهادئه الخجوله
واصبح من النادر ان تجد امرأه على وجهها الخجل
وظهر نوع جديد من النساء
اشد رجوله من رجال هذه الايام
ولكن للاسف فى الجانب السلبى فقط
من حيث العنف واسلوب الكلام وحتى الملابس
قد يقول البعض انها من نتائج هذا العصر
ونزول المرأه للعمل
والانخراط بين الرجال فى المجتمع العامل
ومن الظلم الذى تتعرض له
وللاسف
نجد المرأه التى تعمل تفقد الكثير طبيعتها
وتتحول الى كائن اذد شراسه وخطوره
وحوادث قتل الازواج دليل على ذلك
كان قديما عندما تريد المرأه التخلص من الزوج
ولديها نيه القتل
تستخدم اساليب تتصف بالهدوء
كوضع السم فى الاكل
ثم تطور الامر قليلا
واصبحت تستخدم الالات الحاده
ولكن ليس بالمواجهه مع الزوج
وانما تستغل فرصه نومه وتنقض عليه
اما الان
القتل بالمواجهه
فنجد اخبار عن زوجه ذبحت زوجها بعد خلاف نشب بينهما
ووضعت الجثه اسفل السرير
وتناولت طعام الغذاء مع جارتها بجوار السرير
وفى الليل
تتخلص من جثه زوجها
الى هذا الحد تغير سلوك المراه
صحيح ان فى كثير من هذه الحالات تكون الزوجه تعرضت لظلم فاحش
ولكنى اتحدث عن الاسلوب المستخدم فى القتل
واصبحت المرأه تكثر دمويه
وبسبب انخراط المرأه فى العمل اليومى
اصبح قلبها اكثر خشونه
حتى مع اولادها
وشاهدت امرأه كاد ان يموت طفلها
ولم تهتز لها شعره
وهذا اصبح كثير ايضا
قد يكون التعميم خاطئ
ولكن الامر ذات الفتره الاخيره
اخر عقدين
بشكل مخيف

فهل ترجع الزوجه الى البيت للتفرغ لرعايه ابنائها
ام تعمل لزياده دخل الاسره ولتعيش حياه كريمه

هذا هو مربط الفرس

.

احنا بنشترى راجل

طبعا هذه الجمله اصبحت تندرج تحت بند الخيال العلمى
ودخلت الانتك خانه على اعتبار انها من الحفريات
ومن واتته الشجاعه على ان يتقدم لخطبه فتاه
وهذا طبعا اذا كان يمتلك المقومات الاساسيه للزواج
من شقه واثاث وشويه حاجات صغيره فوق بعض
وطبعا الوظيفه
سيجد من يرحب به عريسا لأبنتهم
مع بعض التحفظات البسيطه
ويقولون انها بعض الشكليات الفارغه
المهم اننا بنشترى راجل
واهلابك ويا مراحب وشربات وجاتوه
وندخل فى التفاصيل
طبعا شقه 400 متر
زى بنت خالتها (ولا هى يعنى اقل منها)
ويا حبذا لو كانت بحرى والعماره فيها سانسير (المصعد يعنى)
وعلشان الجو hot اليومين دول
لازمن ولابد يكون فى الشقه 4 اير كونديشن (تكيييييييييف )
اصل بنتنا زى البسكوته وبتفرفر من الحر
وشويه كماليات بسيطه كمان
اشرب شربات يا حبيبى
ندخل بقى فى العفش والنابوليا
من كل بد لازم يكون العفش لا يقل عن 150 الف جنيه
ولا هى اقل من بنت عمها يعنى

كل جاتوه يا حبيبى
اجبلك مشبك وهريسه

ندخل بقى فى الشبكه
احنا ميهمناش الفلوس
احنا بنشترى راجل
بس الشبكه لازم تكون من عند لازوردى اوشبكه الماظ ب 100 الف جنيه
ولا يعنى هى ماتشبهش هايفه يعنى

يفضل ايه يا واد يا ابو العروسه
آه
الفرح وشهر العسل
دى طبعا شكليات فارغه وبسيطه
الفرح فى الفور سيزون او الشيراتون
وشهر العسل فى شرم او بورتو السخنه
وبلدنا احسن من غيرها

اما لو عاوز تقضى شهر العسل فى باريس
معندناش مانع
انت وراحتك
علشان تعرف اننا مش متذمتين
وبنشترى راجل

والفلوس بتروح وتيجى
المهم اننا بنشترى راجل
والباقى كماليات زى ما اتا شفت

مالك يا ابنى
اطلبى الاسعاف يا سعاد
الجدع مش عارف ماله
مع انى كنت متساهل معاه جدا

ولا كان عاوزنى اصرف عليه كمان

شباب اخر زمن
.

اتجوز ازاى

بعد ما تناقشنا فى حلقه سابقه سبب الجواز واتجوز ليه

يجب ان نطرح الخطوه الثانيه على الشباب لنعرف كيف يتزوج

او كيف تختار شريكه حياتك (3/4 حياتك يعنى مش النص )

وكالعاده التحمنا بالشباب فى شوارع المحروسه

ونقول آلو

ومعنا أحد الشباب وعند مواجهته بالسؤال تتجوز ازاى

قال : حتجوز زى خلق الله هو الانسان ايه غير كائن يعيش ويتعايش ويتزوج
ايه الاباحه دى روح العب بعيد يا واد

وجرى ورائنا بالهراوات وحالف ليكسر دماغى

مشاهدين اخر زمن

وتقابلنا مع شاب اخر " شاب سيس "
فقال : انا حتجوز البنت فوفه صاحبنى الانتيم علشان اغيظ البنت سوسه
اللى نفضتلى ومشيت مع الواد كيمو
يلا هه

وقبل ان اخبطه بالميكروفون هرب الندل من امامى
لانه كان على موعد مع تيتى مؤسسه شله

احنا الشباب السيس

وهربنا من الشباب السيس حتى نجد شاب عاقل لننهى معه الحلقه الهباب دى

ووجدنا مجموعه من الشباب فطرحنا وضربنا عليهم هذا السؤال

فقال احدهم : الجواز نوعين

جواز صالونات وجواز معرفه

وكل شيخ وله طريقه

وانا انحاز لجواز الصالونات لانه يكون أأمن واحسن

فتدخل اخر منفعلا قائلا
لا انا انحاز لجواز المعرفه لان الطرفين يمكنهم دراسه بعضهم
ومعرفه مزايا وعيوب الطرف الاخر

فانفعل شاب ثالث قائلا انا اختلف مع الصديق العزيز
فجواز الصالونات يتم عن طريق الاهل ويكون الاختيلر اصوب واسلم

فثار عليهم زميل اخر محتدا على كلامه
ولذلك كان لزاما على التدخل لتهدئه الامور
فقلت لهم

دقيقه سأعطيك المجال
دقيقه سأعطيك المجال

فتدخل الشاب الاول قائلا لصديقه الثانى : اخرس ايها العميل
فرد عليه : انت خائن وخسيس

ورد زميلهم الثالث بأن رشقهم بالحجاره

فتدخلت بدورى مهدئأ وقائلا :

دقيقه سأعطيك المجال

وكنت مضطرا ان انهى الحلقه قبل ان يهدر دمى بين الشباب

وختمت الحلقه من برنامج

الاتجاه المخالف

بأن طلبت الاسعاف لتأخد الجرحى والقتلى
.

علقه حب

ايا حبيبتى

أقبلى الى

هااااااااى بقولك انتى

فأنى أحبك بشراسه

ومجانصى بتنادى عليكى

وترابيسى تحن أليكى

وعضلاتى بتشد عليا

علشان انتى بعيد عن عينيا

فهلمى لنجلس سويا

ونشيل حديد

ونلعب ماتش بوكس شديد

فأنا أشتاق أليكى

شوق الكوتش للتمرين

وشوق الكلابظ للضربه القاضيه

فأنت لى كبطوله الدوله

وأحلى من ميداليه اوليمبيه

فاذا اردتى ان نلتقى

أتصلى بيا على الارقام ديا

عضله . مجانص . مجانص . عضله. ترباس

فى انتظار الرنه

هااااااااااااى بقولك انتى

من طرف الكوتش حبيبك

بطل حوارى بشليت الحصه وما حولها

ومصنف رقم 75289763574543254 على العالم

لا تحب زوجتك

هل ستحب زوجتك؟

لا

هذه هى الحقيقه

هذا الموضوع قرأته من قبل للمفكر الكبير
د/مصطفى محمود

ما هى العلاقه الصحيحه بين الرجل والمرأه؟

(طبعا فى الزواج )

1-قبل الزواج

(مرحله الخطوبه )

يحب الشاب او الفتاه ان يسمع من الطرف الاخر كلمه بحبك بمناسبه وبدون مناسبه وتكون اسهل من التنفس

2- بعد الزواج

تحاول الزوجه بكل الطرق ان يقول لها زوجه هذه الكلمه
ولا تنجح الا نادرا

وتقول لزوجها لماذا لا تقول لى احبك
وتتعجب ان لا يقولها
رغم ان كل تصرفاته تقول هذا

لسانه لا يقولها
ولكن عينيه تنطق بها
جميع تصرفاته تعبر عنها

وتظن بعض النساء ان زوجها لا يحبها
وان العلاقه بينهم اصبحت روتينيه

ولكن هذا ليس صحيحا

لان الحب قبل ازواج ليس هو نفسه بعد الزواج

فالحب هو جزء صغير جدا من الشئ الاهم بعد الزواج

وهو الموده والرحمه

وهما اكبر بكثير من الحب

فالحب بمعناه الدارج

ممكن ان يموت
فالمثل الانجليزى يقول

"اذا دخل الفقر من الباب
هرب الحب من الشباك "

ولكن الموده والرحمه لا ينتهيان
ولا يتأثران بأى عامل
سواء كان الفقر او المشاكل او المحن

ولكى نتأكد

نعود الى ما قاله الدكتور الكبير مصطفى محمود

عن الحب فى القرآن

فكلمه الحب ذكرت كثيرا فى القرآن

ولكن تعبيرا عن العلاقه بين العبد وربه

والمره الوحيده التى ذكرت فيها كلمه الحب بين الرجل والمرأه

كانت فى قصه سيدنا يوسف وامرأه العزيز

بسم الله الرحمن الرحيم

وَقَالَ نِسْوَةٌ فِي الْمَدِينَةِ امْرَأَتُ الْعَزِيزِ تُرَاوِدُ فَتَاهَا عَنْ نَفْسِهِ ۖ قَدْ شَغَفَهَا حُبًّا ۖ إِنَّا لَنَرَاهَا فِي ضَلَالٍ مُبِينٍ (30)

صدق الله العظيم

اى كان حبا غير شرعى

وعند ذكر العلاقه الزوجيه فى القرآن

تقترن دائما بالموده والرحمه

( وجعلنا بينكم موده ورحمه )

وهو التعبير الصحيح لهذه العلاقه الابديه لان الموده والرحمه اكبر بكثير من الحب العادى

وطالما وجدت الموده بين الزوجين تنجخ العلاقه الزوجيه مهما قابلها من مشاكل

ولكن اذا استمر حبا فقط بعد الزواج

فعلى الزوجه ان تحذر

فهذا الحب مسير ان يذبل ويموت

وعندها سيمل منها زوجها

وعلى الزوجه الحفاظ على الموده والرحمه بينها وبين زوجها

ولا تبحث عن كلمه الحب على لسانه فقط

لانه ليس لكل ارجال القدره على التعبير عن مشاعره بشكل صحيح

وانما يكفى ان تراها فى عينيه ومشاعره وصرفاته

واللبيب بالاشاره يفهم

هذا ليس معناه الا يقول الزوج للزوجه انه يحبها

فنحن ستخدم كلمه الحب كتعبير مجازى

ولكن لا يجب ان يظل حبا فقط

رامى واصل

بحب على روحى

لماذا ننتظر الطرف الاخر لكى نحب

فالحب موجود دائما

موجود فى كل شئ حولنا

الحب ابسط واحلى معانى الحياه

ولكننا نختزله فى علاقه مع طرف اخر فقط

ولذلك يذبل الحب سريعا ويموت

لاننا لم نقدر الحب ولم نعطه حقه

فالحب مبدأ

عندما تجده وتقتنع به تشعر به فى كل لحظه ومع كل تصرف

تشعر به عندما تصحو وعندما تتنفس وعندما تقابل شخص عزيز عليك

فلماذا نبخل على انفسنا بالحب

ونختزله فى رجل او امرأه فقط

هذا ظلم كبير للحب

وعدم ادراك المعنى الحقيقى للحب

لا تطلب من احد ان يعطيك الحب

وانت عاجز عن فهم معانيه

فالحب هو الجمال

وكن جميلا ترى الوجود جميلا

وعندما تملئ قلبك بالحب

ستنشره على من حولك

وتراه فى عيون الاخرين

ففاقد الشئ لا يعطيه

فتسلح بالحب اولا

تجده من حولك يبادلونك الحب

من انسان ونبات وحتى الجماد

فجدد قلبك بالحب

تجد سريعا من يحبك ويبادلك الحب دائما

فلا تكن بخيلا مع نفسك فى الحب

حتى لا يبخل عليك الاخرون به

وافعل مثلى

وحب على روحك

اتجوز ليه

اتجوز ليه

سؤال يطرح نفسه بين الشباب

ولاهتمامى بهذا الموضوع " بما انى اكتر واحد عاوز يتجوز "

وعلى غرار برامج التلفزيون المصرى

نزلنا للشارع وانخرطنا بين الشباب وطرحنا عليهم هذا السؤال

وقابلنا شاب روش وطرحنا عليه هذا السؤال

وقال: واتجوز ليه اصلا

انا كده زى الفل ومعايا صحبتى الانتيم فوفى

ومش ناقص وجع دماغ وجواز ومسؤليه وعيال

انا كده بيييييييييييييييس قوى

فله عليك

وانتقلنا الى شاب اخر يهيم على وجهه فى الشوارع وفى حاله يأس

قال : وهو انا لاقيت جواز وقلت لأ

الايد قصيره والعين بصيره وانا مش بشتغل ومعيش اكل علشان اتجوز

يعنى اعمل ايه اتجوز على روحى منه لله اللى كان السبب

وهربنا منه الى شاب اخر وان كان مبتسما طول الوقت

قال: لدى العديد من الاسباب للزواج

منها على سبيل المثال لا الحصر

1- سبب بيلوجى

عاوز حد " يليف ضهرى وانا بستحمى "

2-سبب نفسى

انا مصاب بالماسوشيه وعاوز حد " يهزئنى يهزئنى "

3- سبب اجتماعى

علشان البس دبله فى ايدى الشمال

4-سبب معنوى

عاوز اشوف عيالى قبل ما اعجز

5- سبب بيطرى

كلنا لها ومقدرش على الحمار قدر على البردعه

وعلشان عاوز ابيض انا كمان اشمعنا الفراخ

وعند هذا الحد انقلب 180 درجه واصبح كالمجنون

وفررنا من امامه لانه بدأ يشد فى شعره ويحدفنا بالطوب

طلع اهبل ياعينى

وقبل ان نلغى فكره الالتحام بقوى الشعب العامله

قابلنا شاب يبدوا عليه سمات العقل والهدوء

وقال لا فض فوه : قبل ان تتزوج يجب ان تكون أهل للمسؤليه ولديك القدره الذهنيه واعصبيه والعقليه قبل الماديه لتفتح بيت

لان الزواج ليس تجربه للهزار حتى لا يتكرر موضوع الطلاق المبكر

او ان تلقى وجهه ربك الكريم مبكرا على يد الزوجه المصون فى خلاف بسيط

وتظل محتفظ بكرامتك التى قد تهدر على يد حماتك اللطيفه

ولتستطيع ان تربى ابنائك تربي سليمه دون عقد

وحتى لا تضطر ان تنهى المشكله كصاحبنا بالصوره " والله جدع "

فأما ان تكون رجل

او تظل اعزب تقليلا لحوادث القتل

وهكذا اعزائى الشباب

انتهت حلقتنا مع شباب هذا العصر

والى ان نلتقى فى الافراح بأذن الله

كان معكم

رامى واصل

من احد شوارع مصر المحروسه

اجدع ناس